საფრანგეთში - ახალი სოციალური ინიციატივა

2026 წლის ფინანსური კანონის ფარგლებში საფრანგეთის მთავრობამ მნიშვნელოვანი სოციალური გადაწყვეტილება მიიღო: 2026 წლის მაისიდან ყველა სტუდენტს შეეძლება უნივერსიტეტის სასადილოებში 1 ევროდ მიიღოს სრული კვება. აღნიშნული გადაწყვეტილება მიზნად ისახავს სტუდენტების ფინანსური მდგომარეობის გაუმჯობესებას და მათთვის ხელმისაწვდომი კვების უზრუნველყოფას.

ამჟამად საფრანგეთში უნივერსიტეტის სასადილოები, რომლებიც Crous-ის (სტუდენტთა სოციალური მომსახურების რეგიონული ცენტრები) მიერ იმართება, 1 ევროდ კვებას მხოლოდ სტიპენდიანტ სტუდენტებს ან ფინანსურად რთულ მდგომარეობაში მყოფ არასტიპენდიანტ სტუდენტებს სთავაზობს. დანარჩენი სტუდენტები კი სოციალურ ტარიფს – დაახლოებით 3,30 ევროს – იხდიან თითოეულ კვებაზე.

ახალი კანონით ეს შეღავათი ყველა სტუდენტზე გავრცელდება. ეს ნიშნავს, რომ საფრანგეთის ყველა უნივერსიტეტის სასადილოში სტუდენტებს ერთნაირი - 1 ევროს - ფასი ექნებათ, მიუხედავად მათი სოციალური სტატუსისა.

რეფორმის განხორციელება ეტაპობრივად დაიწყება 2026 წლის მაისში. მაისი სპეციალურად შეირჩა, რადგან ამ პერიოდში უნივერსიტეტის სასადილოებში ნაკლები დატვირთვაა, რაც საშუალებას მისცემს სისტემას ტესტირების ეტაპი გაიაროს. მთავრობის მიზანია, რომ ახალი პროგრამა სრულად გამართული იყოს 2026 წლის სექტემბერში, როდესაც ახალი აკადემიური წელი დაიწყება.

Crous უახლოეს პერიოდში გაავრცელებს დამატებით ინფორმაციას იმის შესახებ, თუ რა წესით შეძლებენ სტუდენტები 1 ევროდ კვების მიღებას.

ეს გადაწყვეტილება სტუდენტური ცხოვრების გაძვირების ფონზე მნიშვნელოვან მხარდაჭერად ითვლება და მიზნად ისახავს, რომ სტუდენტებს ჰქონდეთ ხელმისაწვდომი და ხარისხიანი კვება სწავლების პერიოდში.