ნიცაში ქართული საგანმანათლებლო სივრცე იხსნება

ნიცაში მოქმედი ქართული ასოციაცია SGN Solidarité Géorgienne Nice ქართველი ოჯახებისთვის ახალ საგანმანათლებლო სივრცეს ხსნის École Géorgienne de Nice – SGN.

სკოლა შეიქმნა ნიცასა და მის შემოგარენში მცხოვრები ქართველი ბავშვებისთვის, რათა მათ ჰქონდეთ შესაძლებლობა, შეისწავლონ და შეინარჩუნონ ქართული ენა, კულტურა და ისტორია. ემიგრაციაში მცხოვრები ბავშვებისთვის მშობლიურ ენასთან კავშირის შენარჩუნება განსაკუთრებით მნიშვნელოვანია, რადგან ქართული ენა არის არა მხოლოდ კომუნიკაციის საშუალება, არამედ იდენტობის, ფესვებისა და სამშობლოსთან კავშირის საფუძველი.

École Géorgienne de Nice - SGN ბავშვებს შესთავაზებს ქართულ ენაში, კულტურასა და ისტორიაში საგანმანათლებლო გაკვეთილებს. სკოლაში სწავლა უფასო იქნება, რაც ქართველ ოჯახებს შესაძლებლობას მისცემს, ბავშვებმა ხელმისაწვდომად მიიღონ ქართული განათლება და შეინარჩუნონ კავშირი მშობლიურ კულტურასთან.

სკოლა იქნება მეგობრული გარემო, სადაც ბავშვები შეძლებენ ქართულად საუბარს, სწავლას, ერთმანეთთან ურთიერთობას და ქართული ტრადიციების უკეთ გაცნობას.

ასოციაცია SGN - Solidarité Géorgienne Nice-ის მიზანია ნიცაში მცხოვრები ქართველების გაერთიანება, მხარდაჭერა და ქართული კულტურის პოპულარიზაცია. სწორედ ამ მიზნის ნაწილია ქართული სკოლის გახსნა, რომელიც მომავალ თაობას დაეხმარება, უცხოეთში ცხოვრების მიუხედავად, შეინარჩუნოს კავშირი ქართულ ფესვებთან.

სკოლის მისამართი:

École Géorgienne de Nice – SGN მდებარეობს ნიცაში, მისამართზე: 14 Rue Pertinax, 06000 Nice, France.