Parcoursup 2026: გადამწყვეტი თვე ფრანგულ უნივერსიტეტებში ჩასარიცხად

საფრანგეთში უმაღლეს განათლებაში ჩარიცხვის პროცესი ერთ-ერთ ყველაზე მნიშვნელოვან ეტაპს უახლოვდება.

ეროვნული პლატფორმა, რომლის მეშვეობითაც აბიტურიენტები და სტუდენტები პირველ კურსზე სწავლის გაგრძელებას გეგმავენ, რამდენიმე დღეში ოფიციალურად გახსნის არჩევანების (vœux) შეტანის ფაზას.

ეს ეტაპი განსაკუთრებით მნიშვნელოვანია, რადგან სწორედ აქ ყალიბდება თითოეული კანდიდატის აკადემიური მომავალი. არჩევანების სწორად დაგეგმვა, ვადების დაცვა და დოსიეს სრულყოფილად მომზადება პირდაპირ გავლენას ახდენს მიღების შანსებზე.

მკაფიო კალენდარი - წარმატების საფუძველი

Parcoursup-ის 2026 წლის სესია მკაცრად გაწერილ კალენდარს ეყრდნობა და სამ ძირითად ეტაპად იყოფა:

• ფორმაციების გაცნობა და ინფორმაციის შეგროვება

  2025 წლის ოქტომბრიდან 2026 წლის იანვრამდე კანდიდატებს შესაძლებლობა ჰქონდათ დეტალურად გაცნობოდნენ სასწავლო პროგრამებს, მოთხოვნებსა და პერსპექტივებს.

• რეგისტრაცია და არჩევანების შეტანა

  19 იანვრიდან 12 მარტამდე კანდიდატებს შეუძლიათ საკუთარი სურვილების დაფიქსირება (ალტერნატიული სწავლების შემთხვევაში - 8 სექტემბრამდე). დოსიეს შევსება და არჩევანების დადასტურება შესაძლებელია 1 აპრილამდე.

• მიღების გადაწყვეტილებები

  2 ივნისიდან 11 ივლისამდე ეტაპობრივად ქვეყნდება სასწავლო დაწესებულებების პასუხები, რასაც მოსდევს საბოლოო გადაწყვეტილებების მიღება.

მნიშვნელოვანი თარიღები, რომლებიც არ უნდა გამოგრჩეთ

• 19 იანვარი - პლატფორმის გახსნა და არჩევანების შეტანის დაწყება

• 12 მარტი - არჩევანების შეტანის ბოლო დღე (გარდა ალტერნატიული სწავლებისა)

• 1 აპრილი- დოსიეს დასრულებისა და არჩევანების დადასტურების ბოლო ვადა

• 2 ივნისი - ძირითადი მიღების ფაზის დაწყება

• 11 ივლისი - ძირითადი მიღების ფაზის დასრულება

• 10 სექტემბერი - დამატებითი მიღების ფაზის დასრულება

აღსანიშნავია, რომ ლა-რეუნიონის აკადემიაში მყოფი კანდიდატებისთვის არჩევანების შეტანის ვადა 19 მარტამდეა გადატანილი, რეგიონული სასკოლო არდადეგების გათვალისწინებით.

რას სთავაზობს Parcoursup კანდიდატებს

პლატფორმაზე წარმოდგენილი თითოეული პროგრამა მოიცავს დეტალურ ინფორმაციას:

• სასწავლო დაწესებულებისა და კურსის შინაარსის შესახებ;

• კანდიდატების შერჩევის კრიტერიუმებსა და მოთხოვნებს;

• პროგრამის კონკურენტუნარიანობისა და მიღების სტატისტიკას;

• კურსდამთავრებულთა დასაქმების მაჩვენებლებს.

ეს მონაცემები კანდიდატებს ეხმარება არა მხოლოდ არჩევანის გაკეთებაში, არამედ რეალისტური და გააზრებული საგანმანათლებლო პროექტის ჩამოყალიბებაში.

Parcoursup არ არის მხოლოდ ტექნიკური პლატფორმა - ის წარმოადგენს სტრატეგიულ ინსტრუმენტს, რომელიც ახალგაზრდებს საკუთარი აკადემიური და პროფესიული გზის დაგეგმვაში ეხმარება. სწორად შერჩეული არჩევანები, დროულად მომზადებული დოსიე და ინფორმირებული გადაწყვეტილებები წარმატებული სტუდენტური მომავლის საფუძველია.