გაჩერების გარეშე გადახდა: ახალი ეპოქა საფრანგეთის გზებზე

საფრანგეთში ავტობანებზე ამოქმედდა გზის გადასახადის ახალი მოდელი — „péage en flux libre“, რაც ნიშნავს გადახდას უწყვეტ ნაკადში. სისტემა მიზნად ისახავს სატრანსპორტო მოძრაობის გამარტივებას, მგზავრობის დროისა და საწვავის ხარჯის შემცირებას, ასევე ეკოლოგიური ზემოქმედების შემცირებას.

სად ამოქმედდა სისტემა

გადახდის ახალი პრინციპი პირველად დანერგეს A79 ავტობანზე (Allier რეგიონში) და A4 გზატკეცილზე (Boulay-ის გასასვლელთან, №36).

ახლა კი, სისტემა ამოქმედდა A13–A14 მაგისტრალზე, რომელიც აკავშირებს პარიზს და ნორმანდიას — ერთ-ერთ ყველაზე დატვირთულ სატრანსპორტო დერეფანს ქვეყანაში.

როგორ მუშაობს „გადახდა უწყვეტ ნაკადში“

ამ გზებზე ტრადიციული ბარიერები და სალარო პუნქტები გაუქმებულია. მძღოლებს აღარ უწევთ გაჩერება გადასახადის გადასახდელად — გზაზე განთავსებული სპეციალური ელექტრონული პორტალები ავტომატურად აფიქსირებენ ავტომობილის გამავლობას და ადგენენ გადასახადის ოდენობას.

გადასახადის გადახდა შესაძლებელია 72 საათის განმავლობაში შემდეგი გზებით:

• ონლაინ, ავტობანის ოპერატორის ოფიციალურ ვებსაიტზე (ანგარიშის შექმნით ან მის გარეშე);

• ბარათით ან ნაღდით, Nirio-ს სისტემით აღჭურვილ თამბაქოს მაღაზიებსა და პრესის ობიექტებში;

• ტელეპეაჟის ბეჯის (სპეციალური ელექტრონული მოწყობილობა, რომელიც ავტომატურად ახორციელებს გზის გადასახადის გადახდას) მქონე მძღოლებისთვის თანხა ავტომატურად ჩამოიჭრება.

გადაუხდელობის შემთხვევაში

თუ გადასახადს არ გადაიხდით 72 საათის განმავლობაში, ავტობანის კომპანია აგზავნის დაჯარიმების შეტყობინებას ავტომობილის მფლობელზე. შეტყობინება მოიცავს:

• გზის გადასახადის თანხას;

• 90 ევროს ოდენობის ფიქსირებულ ჯარიმას, რომელიც 10 ევრომდე მცირდება, თუ გადახდა განხორციელდება 15 დღეში.

გადაუხდელობის გაგრძელების შემთხვევაში, ორი თვის შემდეგ ჯარიმა იზრდება და ხდება 375 ევრო.

როგორ ავიცილოთ გადახდის დაგვიანება

ავტობანის ოპერატორების ვებსაიტებზე ხელმისაწვდომია სერვისი „გადასახდელი პეაჟის შეტყობინება“, სადაც მძღოლი უთითებს ავტომობილის ნომერს, ელფოსტას და იმ გზებს, რომლებსაც იყენებს. სისტემა დროულად ახსენებს გადასახადის გადახდის ვადას და ამცირებს დაგვიანების რისკს.

ყურადღება — ყალბი შეტყობინებების შესახებ

სისტემის დანერგვის შემდეგ დაფიქსირდა თაღლითობის შემთხვევები, როდესაც მოქალაქეებს ეგზავნებოდათ ყალბი შეტყობინებები გადახდის მოთხოვნით.

ოფიციალური უწყებები მოუწოდებენ მძღოლებს, არ გახსნან საეჭვო ელფოსტები და არ დააჭირონ ბმულებს.

გადახდა შესაძლებელია მხოლოდ:

• ავტობანის ოპერატორების ოფიციალურ ვებსაიტებზე — Sanef (A13/A14, A4) და Aliaé (A79);

• Nirio-ს ქსელის ბიუროებში;

• ან ტელეპეაჟის აბონემენტით.

ეკოლოგიური და ეკონომიკური სარგებელი

საფრანგეთის ეკოლოგიის სამინისტრო აღნიშნავს, რომ ახალი სისტემა ამცირებს საწვავის ხარჯს და მგზავრობის დროს, ამცირებს ჰაერისა და სინათლის დაბინძურებას, ასევე ამცირებს ინფრასტრუქტურის კვალს, რომელიც ადრე საჭირო იყო ბარიერების დასამონტაჟებლად.

გარდა ამისა, გაუმჯობესებულია გზის გამტარობა და შემცირებულია საცობები.

დამატებითი ინფორმაცია:

დეტალური განმარტებები და ხშირად დასმული კითხვები ხელმისაწვდომია საფრანგეთის ეკოლოგიისა და ტრანსპორტის სამინისტროს ოფიციალურ ვებსაიტზე.