ნიცის მერის სახლთან ანტისემიტური ინციდენტის საქმეში ახალი დეტალები გამოიკვეთა

საფრანგეთის ქალაქ ნიცის მოქმედი მერის, კრისტიან ესტროზის, სახლთან მომხდარი ანტისემიტური ინციდენტის გამოძიება გრძელდება. როგორც ადგილობრივი მედია წერს, დაკავებულ ორ ეჭვმიტანილს შორის ერთ-ერთი, სავარაუდოდ, მერის საარჩევნო გუნდში შეღწევას ცდილობდა.

ინციდენტი 2026 წლის 27 თებერვალს მოხდა. ესტროზის სახლის წინ დატოვებული იყო ღორის თავი, ასევე პლაკატი დავითის ყვითელი ვარსკვლავით და შეურაცხმყოფელი წარწერით. მომხდარი ანტისემიტურ ქმედებად შეფასდა.

6 მარტს ესტროზის ადვოკატმა განაცხადა, რომ ერთ-ერთმა ეჭვმიტანილმა მერის საარჩევნო კამპანიაში შეღწევა სცადა, თუმცა მისი თქმით, სამართალდამცავების სწრაფი მოქმედების შედეგად ეს დროულად იქნა აღკვეთილი. ადვოკატი ხაზს უსვამს, რომ ამ ადამიანს საარჩევნო კამპანიის არც ერთ შეხვედრაში მონაწილეობა არ მიუღია.

ნიცის პროკურორის, დამიენ მარტინელის ინფორმაციით, გამოძიების ფარგლებში შესწავლილი მასალების, მათ შორის ჩანაწერების საფუძველზე, იკვეთება, რომ ფაქტში შესაძლოა ოთხამდე პირი მონაწილეობდა.

ფრანგული მედიის ცნობით, გამომძიებლები ასევე განიხილავენ შესაძლო უცხოური ჩარევის ვერსიას, რადგან საქმე ადგილობრივი არჩევნების წინ მოხდა. თუმცა ამ ეტაპზე ეს ვერსია ოფიციალურად დადასტურებული არ არის.

თავად კრისტიან ესტროზიმ სოციალურ ქსელში მადლობა გადაუხადა პროკურორსა და გამომძიებლებს სწრაფი რეაგირებისთვის და აღნიშნა, რომ მათი მუშაობა მისთვის გარკვეული შვება იყო.

მომხდარმა საფრანგეთში კიდევ ერთხელ გააჩინა კითხვები წინასაარჩევნო პერიოდში უსაფრთხოების, სიძულვილის ნიადაგზე ჩადენილი ქმედებებისა და შესაძლო პოლიტიკური ზეწოლის შესახებ.